Iloy sang estudyante nga ginpatay sang kasubong nga estudyante sa Dumangas, luyag mahatagan sang hustisya ang ginhimo sa iya bata; Suspek, napasakaan na sang kaso nga murder

Dumangas, Iloilo (UPDATE) — Desidido ang iloy sang estudyante nga ginpahayag ginlampusan-patay sang kasubong nga estudyante sa Iloilo State College of Fisheries- Dumangas Campus sa pagpasaka sang kaso batuk sa 22-anyos nga suspetsado.

Suno sa iloy nga si Nenen Amihoy, dapat mahatagan sang hustisya ang pagkapatay sang iya bata nga si Willy, 23-anyos.

Ginpabutyag sang iloy nga salaligan niya ang biktima kag siya ang ginalauman nga makapatibawas sa ila pamilya sa kapigaduhon.

Ika-duha si Willy sa anum ka mag-ulutod. Lunsay mangunguma ang ila mga ginikanan sa Barangay Ilaya, Tayasan, Negros Oriental.

‘WALA KALUOY’

Ginpabutyag sang iloy nga wala sang kaluoy ang pagpatay sa iya bata sang suspect nga si Elmer Decilao, 22-anyos sang Barangay Ermita, Dumangas.

May pilas sa tuo nga bahin sang guya, ibabaw nga bahin sang baba, liog kag likod nga bahin sang ulo ang biktima suno sa iloy.

Natalana ipa-autopsy ang bangkay sang biktima antes dal-on sa ila lugar sa Negros Oriental.

‘MURDER’

Murder ang ginpasaka nga kaso sang Dumangas Police kag sang iloy batuk sa suspect.

Gintinguhaan sang Aksyon Radyo Iloilo nga makuhaan sang statement ang suspect apang nagpamalibad siya.

Una na ginpahayag ni Police Chief Inspector Jogen Suegay, hepe sang Dumangas Police Station, nga gin-ako sang suspect ang paghimo sang krimen.

Dugang niya, ginpahayag sang suspect nga wala siya nagahinulsol sa paghimo sa krimen bangud sa pagpakahuya nga ginhimo sang biktima sa iya angut sa pag-akusar nga nagpangawat sang wallet. (JoMaque)