Tiya, ginlabu-patay sang iya hinablos; Biktima, ginapatihan nga ginpahilabtan pa sang ido antes nasapwan suno sa pulis

Aklan — Patay ang 41-anyos nga tiya matapos ginlabu sang iya hinablos sa Brgy. Sugnod, Malinao, sang Marso 10 pero Marso 11 na nasapwan ang bangkay sang biktima.

Posible nga ginpahilabtan pa sang ido bangud may mga parte na sang iya ulo nga wala na sang panit suno sa pulis.

Ginkilala ang biktima kay Irene Victoriano kag suspect si Marjune Victoriano 27 anyos pareho nga residente sang Brgy. Sugnod.

Suno kay SPO2 Josefino Baldomero Jr, imbestigador sang Malinao Police Station, nagpadulong sa bukid ang suspect para magkuha sang ubod sang lubi.

Natabuan nga ara man sa lugar ang biktima bangud didto nahamtang ang iya mga ginasagod nga kasapatan.

Nakit-an sang biktima nga nagdalagan ang iya baka halin sa masi-ut nga parte sang lugar kag nakit-an niya nga didto man ang suspect.

Ginpasibangdan sang biktima ang suspek nga ginhimuslan ang nagdalagan nga baka.

Nanindugan naman ang suspect nga indi matuod ang ginpasibangud sa iya sang biktima kag sa kalain sang buot nagdesisyon na lang siya nga magpauli.

Nag-abtanay ang duha sa alagyan pauli kag liwat nga ginsukmaan sang biktima ang suspect parte sa baka kag ginpahug pa nga ipa-barangay.

Napikon ang suspect rason nga iya ginlabu ang biktima nga naigo sa li-og kag ulo.

Ginpangita sang iya utod ang biktima matapos nga wala nakapauli.

Mga las 10 na sang aga sang Marso 11 nasapwan ang biktima.

Nadakpan naman sa hot pursuit sang police ang suspetsado kag preso na sa Malinao Police Station. (JoMaque)