City Treasurer, ginpahayag ginpahog sang job hire nga drug surrenderer nga wala maswelduhan

Iloilo City – Gin-kaalarma ni City Treasurer Jinny Hermano matapos ginpabati-batian siya sang indi maayo nga istorya sang job hire nga drug surrender bangud wala maswelduhan.

Suno kay Hermano, nakabuya sang tinaga ang job hire nga may grupo sila nga nagapangtumba sang una pero nagbag-o na siya. Nagpakilala pa suno sa iya ang job hire nga drug surrenderer siya.

Natabu ini sang nagpadulong sa iya opisina ang ginabanta sa pito tubtob walo ka job hires lakip ang ginatumod nga drug surrenderer sang Task Force on Moral and Values Formation, pasado las-tres kaina sang hapon, Marso 12 agud magfollow-up sang ila payroll.

Wala ma-swelduhan ang mga job hires bangud naglapaw na ang ila monthly allocation para sa Marso.

Ginpaathag ni Hermano nga indi sila maswelduhan bangud naga-operate ang siyudad sa reenacted budget kag naubos na ang budget sang nasambit nga opisina para sa amu nga bulan.

Dugang niya, ang numero sang job hires sang nagligad nga tuig, amo lang ang maswelduhan pero kon maglapaw na dire, indi na maswelduhan ang iban bangud reenacted budget sang 2018 ang gina-sunod sang siyudad.

Nagapakita lang ini suno sa iya nga naglapaw ang numero sang mga job hires para sa subong nga bulan.

Ginapanindugan ni Hermano nga ginahimo lang niya ang husto nga proseso agud maproteheran ang budget sang siyudad.

Gin-aku ni Hermano nga indi niya kilala ang job hire kag iya lang nahibaluan kon diin siya naghalin nga opisina.

Plano niya nga magpa-blotter angut sa natabu. (JoMaque)