PDEA, ICPO kag City DILG nagatudlu-anay kun kay sin-o dapat isumiter ang listahan sang mga suspected drug personalities sa mga barangay sa syudad
Iloilo — Nagatudlu-anay ang Philippine Drug Enforcement Agency ukon PDEA 6, Iloilo City Police Office kag City- Department of the Interior and Local Government kun kay sin-o dapat isumiter ang listahan sang mga suspected drug personalities sa mga barangay sa syudad.
Suno kay Atty. Ferdinand Panes, director sang City-DILG, nahisugtan sa Iloilo City Peace and Order Council sang Disyembre 13, 2018 nga ‘required’ nga magsumiter ang Barangay Drug-Abuse Councils ukon BADAC sang ila ‘watchlist’ sa PDEA 6 kag ICPO indi maglapaw sa kada ika-15 sang bulan.
Ang ‘watchlist’ ukon ‘confidential list’ suno kay Atty. Panes ang listahan sang suspected drug personalities sa kada barangay.
‘Usually ang binibigyan ay PNP’
Masami nga sa Philippine National Police ginasumiter sang mga BADAC ang ila confidential list suno kay PDEA 6 OIC Alex Tablate.
Dugang niya, wala sang mga punong barangay nga regular nga nagasumiter sang ila confidential list sa ila opisina.
Gina-istoryahan naman sa intel workshop sang PDEA kag PNP ang amo nga impormayon kada bulan suno kay Tablate.
‘Wala pa may nabaton ang ICPO’
Ginpahayag naman ni ICPO Director PSSUPT Martin Defensor Jr. nga wala pa siya sang may nabaton nga BADAC report ukon ‘confidential list’ sugod sang nagpungko siya sa posisyon sang Setyembre, 2018.
Gin-ako ni Defensor nga ginhingyo sang ICPO sa ICPOC sang Disyembre, 2018 nga hatagan man sila sang confidential list agud mavalidate man nila ang impormasyon.
Nagapati si Defensor nga indi nila ma-obligar ang mga BADAC nga magsumiter sa ila sang report.
Dugang niya, sa DILG nagasubmit ang BADAC sang ila report.
Sandig sa Joint Memorandum Circular No. 2018-01 sang DILG kag Dangerous Drugs Board, dapat isumiter sang BADAC sa City Drug Abuse Council ukon CADAC ukon Municipal Drug Abuse Council ukon MADAC ang tanan nga impormasyon nga ila makuha angut sa drug activities kag suspected drug personalities sa ila barangay para mavalidate sang PNP.
Base sa pinaka-ulihi nga record sang Police Regional Office 6, sa 2 628 ka mga drug personalities nga nadakpan sa rehiyon sugod sang Disyembre 5, 2017, 2 169 sa ila ang newly identified drug personalities ukon wala sa drug watchlist. (JoMaque/AT)