Awto, nakabunggo sa van sa Arevalo

Iloilo City — Wasak ang ulo sang Suzuki alto matapos nakabunggo sa van sa Brgy. Sto. Domingo, Arevalo, mga las 10 kaina sang aga, Marso 17.

Suno sa driver sang van nga si Reymel Campo, 27 anyos sang Tiring, Cabatuan, halin siya sa Oton kag padulong na sa Iloilo City sang nadulaan siya sang kontrol sa manibela bangud sang madanlog nga dalan rason nga naglapaw siya sa pihak nga linya kag nakabunggo sa nasugata nga awto.

Nabali ang tuo nga tiil sang driver sang awto nga si Jules Saligbon sang Cagamutan Sur, Leganes. Nagkalapilasan man ang tatlo ka iban pa nga sakay sang awto kag gindala sa ospital.

Gindala man ang driver sang van sa police station para sa dugang nga imbestigasyon. (JoMaque)