Guimaras, nagadumdom man sang ‘Liberation of Panay and Romblon’ kada Marso 18

Guimaras — Nagadumdom man ang probinsya sang Guimaras sang “Liberation of Panay and Romblon” kada Marso 18.

Ini ang paathag ni Vice Governor John Edward Gando matapos wala nabutang ang Guimaras sa Proclamation No. 430 series of 1989 nga nagadeklarar sa Marso 18 sang kada tuig nga Victory Day sa mga isla sang Panay kag Romblon lakip na ang syudad sang Iloilo kag Roxas.

Suno kay Gando, sang ginpaguwa ang Proclamation 430, sub-province pa lang sang Iloilo ang Guimaras kag sang nangin probinsya na sang 1992, sakup gihapon ini sang holiday.

Ang natabu lang suno sa iya amu ang supervening event nga pag-convert sa Guimaras bilang probinsya.

Pero maathag nga dala gihapon ang Guimaras sa paghiwat sang Liberation of Panay and Romblon.

Gin-athag ni Gando nga indi na kinahanglan pa nga magpasar sang resolution ang Sangguniang Panlalawigan sang Guimaras agud ipahibalo nga dala sa paghiwat sang Marso 18 nga holiday ang probinsya bangud sa iya nga madumduman, nagaselebrar man kada tuig ang Guimaras. (JoMaque)