Mga suldado kag NPA members, nag-engkuwentro sa Igbaras; 9 IEDs, narecover sa lugar
Iloilo — Na-engkuwentro sang mga katapu sang 61st Infantry Batallion sang Philippine Army ang ginabanta napulo ka miembro sang New People’s Army (NPA) sang Suyak SDG sa idalum sang Southern Front, Komiteng-Rehiyon, Panay sa Barangay Mulangan, Igbaras las 6 kaina sang aga, Marso 17.
Sa press release sang 61st IB sang Philippine Army, na-recover sang tropa ang siyam (9) improvised explosive device (IED) kag tatlo ka suspected NPA members ang nadakpan.
Gindala sa Igbaras Police Station ang mga nadakpan agud ma-imbestigaran kag mapasakaan sang kaso.
Wala naman sang may napilasan sa mga suldado samtang ginapatihan nga may napilasan sa grupo sang mga rebelde.
Ginpatihan nga nagapreparar ang NPA sang daku nga terroristic activity base sa mga narecover nga IEDs. Ginpahayag ni Lieutenant Colonel Sisenando Magbalot Jr., Commanding Officer sang 61st IB, nga masami gina-harass ukon gina-atake sang mga rebelde ang tropa sang gobierno kag installations agud i-selebrar ang ila anibersaryo kag red letter dates.
Maga-selebrar suno sa iya sang ika-50 nga anibersaryo ang NPA sa Marso 29, 2019. (JoMaque)/61st IB Press Release