10 ka gintudlo NPA members, ginkasuhan kasunod sang engkwentro sa Igbaras

Iloilo — Ginpasakaan na kahapon, Marso 20, sang kaso ang 10 ka ginatudlo miembro sang New People’s Army kasunod sang engkwentro sa tunga sang mga soldado kag ginapatihan mga rebelde sa Barangay Mulangan, Igbaras sang Marso 17.

Ginconfirmar ni Senior Inspector Jose Romel Samson, hepe sang Igbaras Police Station, nga ginkasuhan sang illegal possession of explosives, multiple attempted murder kag direct assault ang ginpasaka batuk sa mag-utod nga Ruperto kag Ramon Enar kag sa pakaisa nila nga si Roberto Elamparo, lunsay pumuluyo sang Barangay Mulangan. Una na gin-report sang police nga nakita sa balay ni Elamparo ang siyam ka improvised explosive device kasunod sang engkwentro.

Ginkasuhan man sanday Jovel ‘Ka Lex’ Ceralvo, Nahum Reymar ‘Ka Bambi’ Camariosa, Jonathan Emolaga, Jonalyn Severio kag tatlo ka wala pa makilala nga mga suspetsado.

Nakilala sang mga soldado ang pila sa mga na-engkwentro nila suno kay Samson rason nalakip sa ginpasakaan sang kaso. (AGB)