Una nga hugnat sang Candidates’ Forum sang Aksyon Radyo kag UPV, nangin madinalag-un

Iloilo City — Nangin madinalag-un ang una nga hugnat sang candidates’ forum sang Aksyon Radyo Iloilo kag University of the Philippines in the Visayas kahapon, Marso 23 sa tunga sang tatlo sa anum ka mga kandidato sa pagka-mayor sa Iloilo City.

Una nga nag-atubangay sa Candidates’ Forum sanday Congressman Jerry Treñas, Dr. Pacita Gonzales kag Mayor Joe Espinosa.

Isa-isa nga ginsabat sang mga kandidato ang mga pamangkot angut sa nagkalain-lain nga social issues nga naga-apekto sa publiko kag nagplastar sang ila tagsa ka solusyon.  

Lakip sa mga ginpamangkot ang isyu sa mataas nga power rate sang Panay Electric Company, problema sa water supply sang syudad, trapiko, baha kag ang kontrobersyal nga pagkuha sang job hires sang city government.

Nangin mainit ang forum sang nagsabtanay sanday Treñas kag Gonzales angut sa nagakatabu nga political split up.

Para kay Treñas, may mga interest siya nga ginasunod agud makapangita sang paagi agud makaserbisyo sa mga pumuluyo rason nga nagbulag siya sa grupo sang mga Gonzales sang 2010 kag sa iya bilas nga si Mayor Espinosa.       

Pero ginbanatan ni Gonzales ang kongresista angut sa ginapangatubang niya nga kaso sa Sandiganbayan nga ginsabat naman ni Treñas. (JoMaque)