Phil. Army, nagpanugyan sa mga turista nga likawan ang pagkadtu sa mga tourist destinations sa nabukid nga parte sang Igbaras, Miag-ao kag San Joaquin

Miagao—Nag-abiso ang Philippine Army sa mga local tourists nga likawan ang pagkadtu sa mga tourist destinations nga nahamtang sa nabukid nga bahin sang Miagao, Igbaras kag San Joaquin.

Suno kay Lieutenant Colonel Sisenando Magbalot Jr., commanding officer sang 61st Infantry Battalion sang Philippine Army, ginduso ang lihok agud malikawan nga maipit sa engkwentro ukon madudahan ang mga natungdan bangud sang nagapadayon nga pursuit operation sang mga soldado batuk sa mga miembro sang New People’s Army.

Pinakaulihi nga nag-engkwentro ang mga soldado kag kapin 20 ka mga rebelde nga ginapatihan miembro sang Suyak Platoon, Southern Front Komiteng Rehiyon Panay sang NPA sa Barangay Alimodias, Miagao kahapon, Marso 24.

Napatay ang ginapatihan lider sang NPA nga ginkilala kay Leonardo Seterra, anay barangay kagawad sa Danawan, San Joaquin suno kay Police Chief Inspector Johnny Tumambing, hepe sang Miagao Police Station.

Antes sini, nag-engkwentro man ang mga soldado kag ginapatihan miembro sang NPA sa Barangay Mulangan, Igbaras sang Marso 17; San Remigio, Antique sang Marso 19 kag Barangay Indaluyon, Igbaras sang Marso 20.

Ginakuhaan pa sang Aksyon Radyo Iloilo sang pahayag ang natungdan nga Local Government Units angut sini.

SUPORTADO SANG DOT

Suportado naman ni Department of Tourism ukon DOT 6 Director Helen Catalbas ang abiso sang Philippine Army.

Suno kay Director Catalbas, prayoridad ang safety sang mga pumuluyo kag turista.

Natalana magpaguwa sang travel advisory si Director Catalbas. (JoMaque)