Councilor Plaridel Nava, ginreklamo sang 4 staff sang WVMC nga ginpahayag nag-eskandalo kag nagpang-singgit; Konsehal, nagpaathag sa reklamo batuk sa iya
Iloilo City – Ginpa-blotter sang apat ka staff sang Western Visayas Medical Center (WVMC) si Councilor Plaridel Nava nga ginpahayag nag-eskandalo kag nagpang-singgit sa ospital kaina sang aga, Marso 25.
Ang mga nagpa-blotter amo sanday Dr. Ma. Cristina Woo, Chief Medical Professional Staff; Ivy Huertas, Administrative Officer V; Michelle Villa, Administrative Officer III; kag Mary Jane Sasana, Administrative Aide VI.
Base sa blotter entry sa Mandurriao Police Station, nagpadulong sa Out Patient Department (OPD) sang ospital si Ma. Cecilia Nava, anay asawa sang konsehal, agud magkuha sang “medico legal certificate” bangud na-ospital ang iya bata nga menor-de-edad nga lalaki.
Pero suno sa mga tagreklamo, wala gilayon mahatag bangud base sa ila pagsulundan nagakinahanglan sang police request for medical examination antes i-release ang ila gina-request.
Sandig sa ila reklamo, hinali nga nag-eskandalo ang konsehal kag nagpang-singgit.
Ginpanugyanan ni Dr. Woo ang konsehal kag si Mrs. Nava nga maghulat bangud ginadala na ang police request sa ospital.
Ginpahayag nga liwat nagtindog ang konsehal kag liwat nga nag-eskandalo.
Pag-abot sang police, nahatag man ang ila request nga “medico legal certificate.” Liwat man suno sa ila nga nagpang-singgit ang konsehal kag ginatudlo-tudlo pa sila.
PAATHAG NI COUNCILOR NAVA
Nagpa-athag si Councilor Nava kasunod sang reklamo sang mga medical staff sang WVMC bangud sa ginpahayag pagka-eskandalo sang konsehal sa ospital.
Suno kay Nava, nag-alburuto siya sa ospital matapos wala nahatag sa oras sang ospital ang ginapangayo niya nga medical certificate.
Ginpahayag sang konsehal nga Sabado sila nag-request sang medical certificate sa iya 12-anyos nga bata nga lalaki nga naigo sang bato samtang nagakatulog sa ila balay.
Nagpasalig ang ospital suno sa iya nga i-release ang medical certificate sa Lunes sang aga kabangdanan naghingagaw man pila ang iya asawa.
Pero wala gilayon mahatag sang ospital ang medical certificate bangud nagpangayo pa sila sang police request para sa medical examination.
Ang iya lang suno sa konsehal nga makuha niya gilayon ang medical certificate antes mag alas 12:00 sa udto para mahingagaw niya file ang kaso batuk sa anum ka suspek nga naghaboy sang bato sa ila balay nga nagresulta sang pagkaigo sang iya bata.
Gin-ako ni Nava nga nagpamuyayaw siya sa ospital pero indi direkta sa nasambit nga mga staff kondi sa ospital bangud sa mahinay nga aksyon sa iya ginapangayo nga medical certificate.
Ginpa-athag ni Nava nga indi medico legal certificate ang iya ginapangayo kondi medical certificate. (JoMaque)