Hinablos, ginbuno sang tiyo sa Alimodian

Alimodian, Iloilo — Pilason ang hinablos kag confined sa Western Visayas Medical Center matapos ginbuno sang iya tiyo sa Barangay Binalud las 7 kagab-i, Marso 25.

Ginkilala ang biktima kay Jason Bernales, 33 anyos kag suspect naman si Alexander Almendral, 70 anyos.

Suno kay Police Inspector Danilo Noca, hepe sang Alimodian Police Station, naga-inom inom ang suspect kag ang biktima antes natabo ang insidente.

Upod sang duha nga naga-inom ang bata sang suspect nga si Alexander Jr.

Ginpahayag nga may ginba-isan ang biktima kag ang bata sang suspect tubtob nga nakug-an ni Bernales si Alexander Jr.

Sang nakit-an sang tiyo nga ginakuga ni Bernales ang iya bata, ginbuno niya ang hinablos. Ginwahig naman sang hinablos ang tiyo rason nga natumba.

Gilayon nagpulot ang biktima sang matig-a nga bagay kag ginlampos sa iya tiyo.

Gindala man sa ospital ang suspect bangud sang pilas sa ulo tuga sang pagkalampos.

Ginapreparar na sang police ang kaso nga ipasaka batuk sa suspetsado. (JoMaque)