Lapsag nga ginhaboy sa bintana, indi matuod nga gin-aswang – Dumangas Mayor Onal Golez
Iloilo — Indi matuod nga gin-aswang ang bata nga ginhaboy sa bintana matapos nga napatay sa ospital suno kay Dumangas Mayor Onal Golez.
Nakalab-ot sa atensyon ni Mayor Golez ang insidente matapos nagreklamo ang pila ka pumuluyo sa Barangay Cayos nga may duha ka bulan nga lapsag nga lalaki nga anum na ka adlaw nga napatay kag wala ginpalubong sang pamilya.
Suno kay Golez, bisan ang police kag ang rural health officer sang banwa ang indi maka-istorya sa pamilya rason nga siya ang nag-istorya sa pamilya kag gin-engganyo nga ipalubong ang bata.
Indi matuod suno sa iya nga nadula ang bata sang ginhaboy sang pamilya sa bintana.
PAATHAG SANG MEDICAL CHIEF SANG DUMANGAS DISTRICT HOSPITAL
Ginkumpirmar sang medical chief sang Dumangas District Hospital nga gindala pa ang duha ka bulan nga bata sa ospital nga ginpahayag gin-aswang.
Suno kay Dr. Gerard Joel Abonado, gindala sa ospital ang bata sang Domingo, Marso 16 pero gindeklarar nga dead-on-arrival.
Sa medical record suno sa iya sang bata, may naguwa nga gatas sa iya baba, gin-revive pa sang doctor on duty kag gin-check ang iya electrocardiogram (ECG) pero napatay ang bata.
Ginpahayag ni Dr. Abonado nga ginpahanugutan na lang nila ang pamilya nga dal-on ang bata sa pagpati nga dal-on man sang pamilya sa punerarya.
Gintugyan naman sang Dumangas District Hospital ang pag isyu sang death certificate sa Rural Health Officer sang banwa.
ANO ANG GINKAMATAY SANG LAPSAG?
Ginpaathag ni Dr. Nelson Belandres, Rural Health Officer sang Dumangas, nga bronchopneumonia ang ginkamatay sang duha ka bulan nga lapsag nga lalaki.
Suno kay Belandres, nakaagi bronchopneumonia ang bata sang ginbun-ag siya sang Enero 13.
Wala nagapati si Dr. Belandres nga gin-aswang ang bata kag wala man siya nagapati nga sang ginhaboy sang pamilya ang bata sa bintana, nadula siya pagtupa sa duta.
Dugang ni Belandres, ginkadtu-an niya ang lugar bangud sa reklamo sang mga residente nga nagabaho na ang bata bangud nga wala gin-embalsamar.
Wala man siya ginpasulod sang pamilya sa balay rason nga si Mayor Golez na ang nag-engganyo sa pamilya nga ipalubong ang bata. (JoMaque)