“Maapektuhan ang turismo” – Igbaras Mayor sa advisory sang Army nga likawan sang mga turista ang nabukid nga tourist destinations sa Igbaras, Miag-ao kag San Joaquin

Igbaras, Iloilo – Nagakahangawa si Mayor Vicente Escorpion nga madugay naman nga magbalik ang mga turista sa ila lugar kasunod sang advisory sang Philippine Army nga likawan ang pagsaka sa nabukid nga tourist destinations sang Igbaras, Miag-ao kag San Joaquin bangud sa sunod-sunod na engkwentro.

Reaksyon ini ni Igbaras Mayor Vicente Escorpion kadungan sa pag-athag nga wala pa siya napahibalo sang army angut sa advisory.

Gin-abisuhan ni 61st IB Commanding Officer Lieutenant Colonel Sisenando Magbalot Jr ang mga turista nga likawan ang gintumod nga areas bangud padayon ang hot pursuit operation sang mga soldado sa mga miembro sang New People’s Army.

Halin sang nagligad nga semana, apat ka beses nga naka-engkwentro sang mga soldado ang ginapatihan nga mga rebelde, pinakaulihi ang natabu sa Alimodias, Miag-ao sang Marso 24 sa diin napatay ang ginapatihan nga NPA leader. (JoMaque)