Councilor Plaridel Nava, nag-file sang kaso batuk sa 4 staff sang WVMC nga nagpa-blotter sa iya

Iloilo City — Nag-file sang kaso administratibo sa Ombudsman kahapon, Marso 26, si Councilor Plaridel Nava batuk sa apat ka staff sang Western Visayas Medical Center bangud sa mahinay nga aksyon sa iya ginapangayo nga medical certificate sang iya menor-de-edad nga bata nga lalaki. Magluwas sa kaso administratibo, ipa-kanselar man  sang konsehal ang lisensya ni Dr. Ma. Cristina Woo, chief sang Medical Professional Staff sa Board of Medicine. 

Separado man nga kaso kriminal ang i-file ni Nava batuk sa staff nga nag-video sa iya samtang ginpahayag naga-eskandalo sa ospital.

Lakip sa pasakaan sang kaso administratibo ni Nava sanday Ivy Huertas, Administrative Officer V; Michelle Villa, Administrative Officer III kag Mary Jane Sasana, Administrative VI.  

Ginkuwestyun man ni Nava ang polisa sang ospital nga indi gilayon makahatag sang medical certificate kon wala sang police request.

Una nga nagpa-blotter ang apat ka hospital staff bangud sa ginpahayag pagyawyaw sa ila sang konsehal kag pag-eskandalo sa ospital.          

Handa naman si nava nga atubangon ang kaso nga iga-file batuk sa iya sang apat ka staff ang ospital. (JoMaque)