Iloilo City — Ginreklamo sang rural health physician sang Miag-ao ang resident doctor sang Western Visayas Medical Center (WVMC) bangud sa indi pagbaton sang gin-refer niya nga pasyente nga senior citizen.

Suno kay Dr. Mary Joyce Bermejo, rural health physician sang Miag-ao, ginrason sa iya ni Dr. Roxane Alasca, resident doctor sang Internal Medicine sa WVMC, nga gina-renovate ang ospital gani indi nila mabaton ang 83-anyos nga pasyente.

Naglain man ang bu-ot ni Dr. Bermejo sang ginhambal ni Dr. Alasca nga yara na sa end stage ang pasyente ukon dali na lang nga mapatay.

Ginpahayag ni Bermejo nga gin-refer niya sa WVMC sang Marso 22 ang pasyente bangud may yara siya sang colon mass, severe anemia kag naga-LBM nga may dala nga dugo.

Indi masarangan suno sa iya sang Guimbal District Hospital ang balatian sang pasyente gani gin-refer sa WVMC para sa tertiary care. (JoMaque)