Liga President Irene Ong, nag-react sa pagdumili sang DILG sa mga barangay officials nga mangampanya; Ong, nagpahahayag nga wala man nila ginapubliko ang ila pagsuporta

ILOILO CITY — Mangin butigon ukon ipokrito ang mga barangay officials kun maghambal sila nga wala sila nagapangampanya sa ila kandidato para sa eleksyon.

Ini ang pahayag ni Liga President Irene Ong matapos ang pronouncement ni DILG Undersecretary Epimaco Densing III nga ginadumilian ang mga barangay officials nga magkampanya.

Suno kay Ong, nagapangampanya man sila apang pribado lang. Indi malikawan ang magsuporta suno sa iya bangud ini na ang naandan.

Ginpahayag ni Ong nga kuntani wala na lang sang mga conventions ukon assembly nga ginapatawag ang mga kapitan sa diin nagatambung ang mga kandidato.

Sa April 3 suno sa iya, may convention na naman sa Cebu kag ginapatawag sa mga barangay officials kag sigurado si Ong nga may mga kandidato man nga makadto. (JoMaque)