Mga job hires sa city hall nga wala pa maswelduhan, nagahingyo nga i-release na ang ila sweldo

Iloilo City – Nagtipon ang mga job hires sa City Hall nga wala pa maswelduhan kag naghingyo kay City Treasurer Jinny Hermano nga pirmahan na ang ila payroll.

Suno kay Jimmy Mendez, naka-detail sa Social Services Division, nagpaminsar siya nga may budget ang syudad para sa ila sweldo gani nga gin-hire sila.

Nagahingyo si Mendez nga i-release na ang ila sweldo agud may ibakal sila sang bugas kag iban pa nga kinahanglan sang ila pamilya.

Gin-athag ni Mendez nga nahisugtan lang nila nga mga wala maswelduhan nga magtipon sa atubang sang City Hall subong nga adlaw, Marso 28, agud ipautwas ang ila sentimento kag wala sang nag-organisar sang ila lihok.

Ginpanindugan man ni Mendez nga wala sang pulitiko nga nagpasulod sa iya bilang job hire kundi personal siya nga nagkadto sa City Hall kag nag-apply. (JoMaque)