Army official, gintawag nga wala sang pulos ang pagrebelde sang NPA sa sulod sang 50 ka tuig

Iloilo — Gintawag sang Army official nga wala sang pulos ang pagrebelde sang New People’s Army sa sulod sang 50 ka tuig.

Suno kay Lieutenant Colonel Sisenando Magbalot Jr, commanding officer sang 61^st Infantry Battalion, wala sang pulos ang pagselebrar sang NPA bangud pagpatay sang mga sibilyan kag pagpangilkil lang ang ila gina-obra.

Nagpasalig si Magbalot nga preparado ang Armed Forces of the Philippines sa pagproteher sa publiko kag pagmentinar sang kalinong kag katawhay.

Padayon man suno sa iya ang pursuit operations sa pagpapas sa mga rebelde.

Ginselebrar kahapon sang NPA ang ila ika-50 nga anibersaryo.

MGA PROGRESIBO NGA GRUPO, WALA NA NAMAG-O

Wala na namag-o ang mga progresibo nga grupo sa Panay sa pag-label sa ila nga ‘front’ sang New People’s Army.

Reaksyon ini nanday Kilusang Mayo Uno Panay spokesperson Roxanne Javellana kag Karapatan Panay Secretary General Reyland Vergara sa pagsulat ni National Security Adviser Hermogenes Esperon sa European Union nga untatan ang paghatag sang pondo sa mga gin-alegar CPP-linked nga grupo.       

Suno kay Javellana, wala sila sang nakuha nga suporta sa EU kag nabuhi ang ila organisasyon sa suporta sang mga mamumugon kag ila pamilya.

Suno naman kay Vergara, ginakabig nga seryoso nga pamahug sang ila grupo ang pag-label sa ila sang administrasyon ni Presidente Rodrigo Duterte nga ‘legal front’ sang NPA.

Sa pihak sang ‘red-tagging’ sa ila grupo, pareho nga ginpasalig nanday Javellana kag Vergara nga indi sila mag-untat sa pagpakigbato sang kinamatarung sang mga pumuluyo. (JoMaque)