Marine Wildlife Watch of the Philippines, nabalaka sa pag-ihaw sang mangingisda sa pawikan sa Brgy. Bay-ang, Ajuy

Nagakabalaka ang Marine Wildlife Watch of the Philippines nga non-profit organization nga maubos ang mga endangered species pareho sang olive ridley turtle ukon pawikan.

Kasunod ini sang mga litrato nga ginpadala sa grupo sang lalaki nga naga-ihaw sang pawikan sa higad sang baybay.

Sa pagpakig-angut sang Aksyon Radyo Iloilo, ginpabutyag sang MWWP nga natabu ang pag-ihaw sa Barangay Bay-ang, Ajuy sang Marso 28.

Suno sa grupo, ginsaway ang lalaki nga indi pwede nga ihawon ang pawikan pero ginpadayon ang iya ginhimo gani nga ginkuhaan siya sang litrato.

Nagapanawagan ang MWWP sa concerned government agencies pareho sang DENR-Biodiversity Management Bureau nga maghimo sang aksyon.

Sa statement man sang grupo nga ginpadala sa Aksyon Radyo, ila ginpabutyag nga mabudlay ang pag-conserve sa mga endangered species sa pungsod bangud wala sang ihibalo ang pumuluyo ukon indi nila luyag nga sundon ang laye samtang wala ginapatuman sang gobyerno ang gintumod nga mga laye.

Ang Marine Wildlife Watch of the Philippines, non-profit kag non-stock organization nga nagaduso sang conservation kag proteksyon sang marine wildlife species kag ila habitat.

REAKSYON NI AJUY MAYOR JETT ROJAS

Suno naman kay Ajuy Mayor Jett Rojas, ginpadala lang sa iya Facebook messenger ang amu nga mga litrato.

Taga-Purok 5 Brgy. Bay-ang suno sa iya ang mangingisda pero wala man sang may nag-ako sang nagpangusisa si barangay kagawad Alvin Jaresco.

Ginsugid man ni barangay kagawad Jaresco nga patay na ang pawikan sang gin-ihaw sang mangingisda.

Pero indi gihapon nagakadapat suno sa alkalde nga mag-ihaw sang pawikan bisan patay na.

Kun may makita gid man nga patay nga pawikan, dapat ini nga ipahibalo gilayon sa pulis ukon sa taga-Bureau of Fisheries and Aquatic Resources (BFAR). (JoMaque)