Driver sang Ceres bus nga nahulog sa pil-as sa Hamtic, Antique, natalana pasakaan sang kaso

Antique — Magapangatubang sang kaso nga reckless imprudence resulting to multiple homicide and multiple serious physical injuries ang driver sang nahulog nga Ceres bus nga si Ramon Abellar, 45 anyos sang Tibiao, Antique.

Suno kay Police Major Adolfo Pagharion, hepe sang Hamtic Police Station, ginapreparar na nila ang pag-file sang kaso batuk sa driver matapos nga na-identify ang mga napatay kag napilasan sa aksidente.

Halin sa syudad sang Iloilo ang bus kag padulong sa San Jose, Antiqe sang nahulog sa pil-as sa national highway sang Barangay Igbucagay, Hamtic sang Biernes sang gab-i, Abril 5.

Sang na-istorya suno sa iya sang imbestigador ang driver sang bus, ginrason ni Abellar nga nalamsot ang preno sang salakyan pero suno sa mga naka-survive nga pasahero, madasig ang pagpadalagan sang driver.

Dead-on-arrival sa Angel Salazar Memorial General Hospital sa San Jose sanday Evangeline Chicano sang Brgy. Ginbangga-an, San Jose; Earl Aron kag Vivien Omanio sang Belison, Antique.  

Pilason naman ang konduktor sang bus nga si Ervin Nepomuceno, 35 anyos sang Pandan, Antique kag lima pa ka pasahero nga ginkilala kanday Loriemae Onera,  19; John Lawrence Sanchez, 18; Jeannine  Eve Chicano, 26; Edwin Omanio, 48 kag alias Gabriel, 16 anyos nga gin-transfer sa ospital sa siudad sang Iloilo.

Global Positioning System (GPS) sang bus

Usisaon sang Hamtic Police station ang global positioning system ukon GPS sang Ceres bus nga nahulog sa pil-as agud mahibaluan kun bala nagsobra sa iya maximum speed limit ang driver.

Ginpahayag ni Police Major Pagharion nga may alarm system ang GPS sang bus kun mag-sobra sa 80 kilometer per hour ang padalagan sang driver.

Naga-transmit suno sa iya sa central monitoring system sang Ceres bus liner ang alarm kun magsobra sa speed limit ang driver.

Naka-hospital arrest ang driver kag natalana pasakaan sang kaso suno kay Pagharion. (JoMaque)