Pres. Duterte, suspendiron ang “Doble plaka” law para sa mga motorsiklo
Iloilo City — Istoryahon ni Presidente Rodrigo Duterte si Senator Richard Gordon para bag-uhon ang gin-author niya nga laye nga naga-require sa pagbutang sang duha kag daku nga license plates sa mga motorsiklo.
Sa iya speech sa 25th Annual National Convention sang National Federation of the Motorcycle Clubs of the Philippines (NFMCP) sa Iloilo Convention Center kagab-i, Abril 6, ginhambal sang presidente nga delikado ang pagbutang sang plaka sa atubang sang mga motorsiklo.
Istoryahon man niya ang Land Transportation Office kag engganyuhon nga i-suspend ang pag-implementar sang Republic Act No. 11235 ukon Motorcyle Crime Prevention Act Bilang rider, ginpahayag ni Duterte nga nahangpan niya ang kahimtangan sang mga naga-motorsiklo sa pungsod.
Sa baylo, hingyuon ni Duterte nga padakuon ang plaka sang mga motorsiklo sa likod nga porsyon sini.
Katuyuan sini nga mas mangin visible sa publiko ang mga plaka sang motorsiklo nga kalabanan ginagamit sa krimen.
Nabalay ang laye nga nagatuyo nga butangan sang duha ka plaka ang mga motorsiklo bangud sa nagadamo nga kaso sang mga krimen nga ginakadalahigan sang riding-in-tandem.
Las-6:20 sang gab-i sang naghugpa sa Iloilo International Airport ang eroplano nga ginsakyan sang presidente. Nag-chopper siya padulong sa Iloilo Sports Complex kag nag-biyahe padulong sa ICC.
Antes nagsugod ang programa, naglantaw pa si Duterte sang mga naka-display nga mga big bike models nga ginapanag-iyahan sang mga dalagku nga kumpanya nga naka-plastar sa lobby sang ICC. Kilala ang presidente nga motorcycle rider kag enthusiast.
Las 7:20 sa gab-i nagsugod ang speech sang presidente kag nagtakop ini las-9:03 sa gab-i.
Nag-sentro sa illegal nga druga, korapsiyon kag pulitika ang kaundan sang iya nga speech.
Gilayon nga nagpauli sa Davao City si Duterte pagkatapos sang iya speech.
Antes ang iya speech, ginapatihan nagsapol ang presidente sa nga local politicians pareho nanday Dr. Pacita Gonzales, Councilor Plaridel Nava, Cong. Ferj Biron kag iban pa. (JoMaque)