Fast craft pakadto sa Iloilo City, nagbalik sa Bacolod City matapos na-aberya

Iloilo – Gin-confirmar ni Lt. Commander Rodolfo dela Peña, commander sang Coast Guard Iloilo Station, nga na-aberya ang fast craft nga Supercat St. Emmanuel bangud sa mechanical trouble.

Suno kay Dela Peña, las-12:30 kahapon sang hapon, Abril 10, sang naghalin sa Bacolod City ang fast craft pero nagkadeperensya ang power steering mga alas-12:50. Ginpatay na lang suno sa iya sang kapitan ang makina.

Ginguyod sang tugboat ang fast craft pabalik sa Bacolod City. Mga alas-4 subong nga hapon, nag-abot sa Bredco Port & Terminal ang sakayan.

Sakay sang fast craft ang 132 ka pasahero kag 12 ka crew. (JoMaque)