Mga badjao sa syudad sang Iloilo, posible nagpa-amulya sa pila ka banwa sa probinsya — PSTMO Head Jeck Conlu

Iloilo City — Naghagan-hagan na ang numero sang mga Badjao nga nagaliho-liho kag nagapangayo-kayo sa siyudad.

Base ini sa pag-monitor sang Public Safety and Transportation Management Office (PSTMO) pila ka adlaw matapos ang ila ginhimo nga dialogue sa mga Badjao.

Suno kay PSTMO head Jeck Conlu, wala na sila sang may nakita nga nagapangyo-kayo nga Badjao sa dalanon magluwas lang sa ila nakita nga pito pa ka mga Badjao nga nagatiner sa idalom sang taytay sa Buhang, Jaro sang Miyerkules (April 10).

May mga indigenous people man sila nga na-monitor nga nagabaligya sang burluloy pero ginklaro ni Conlu nga wala sang problema sa ila basta indi lang sila magpangayo-kayo.

Sang Abril 2, ginpangtipon sang PSTMO upod ang mga social workers ang mga Badjao sa siyudad kag ginhambalan nga mapauli bangud kun magpadayon sila sa pagpasaway, pangdakpon sila kag presuhon.

Posible suno kay Conlu wala nagpauli ang iban sa ila kag sa baylo, nagpa-amulya sa iban nga banwa sa probinsya base man sa nabaton nila nga impormasyon nga may mga Badjao nga nagalagaw sa kaiping nga kabanwahan.

Plano subong sang PSTMO nga mag-istorya sa presidente sang League of Municipalities of the Philippines ukon LMP-Iloilo Chapter agud maplanuhan sang ensakto ang dapat himuon sa mga Badjao. (JoMaque)