7 personalities, ginatudlo nga nagapang-extort sa mga vendors sa Iloilo Terminal Market –LEEO head

Iloilo City – Pito ka mga personalities ang nagaguwa nga ginpahayag illegal nga nagapanukot sang renta sa mga vendors sa fish section sang Iloilo Terminal Market base sa resulta sang imbestigasyon sang Local Economic Enterprise Office (LEEO).

Suno kay LEEO Head Ariel Castañeda, nagpangusisa ang market-in-charge kag pila ka personnel sang LEEO sa mga vendors kasunod nga natukiban nga ginpahayag may extortion nga nagakatabo sa merkado.

Lakip sa mga pangalan nga ginpahayag nagapa-arkila sang tapangko sa mga vendors amu sanday; Punong Barangay Alain Rey Depatillo, Benny Roque, Punong Barangay Noel Soliman, former Punong Barangay Myrna Rey, Lilibeth Concepcion, Sonia Parcon, kag ang gin-identify nga si Daisy.

P50 kada tapangko ang ginabayaran sang mga vendors kada adlaw –P30 sa lamesa, tag-P10 sa suga kag trapal. Magluwas pa ini sa P20 nga ginabayad sang mga vendors nga renta sa City Government.

Base sa impormasyon ni Castañeda nga madugay na ang illegal nga pagpa-renta sa mga vendors sa 79 ka mga tapangko sang nasambit nga mga personalidad.

Ipatawag sang LEEO ang pito ka mga personalidad agud makuhaan sang ila bahin.

Mahimo man suno sa iya sang tul-id nga imbestigasyon sa pito ang mayor’s office kag pasabton kun mapamatud-an ang akusasyon batuk sa ila.

Bukas ang Aksyon Radyo Iloilo sa bahin sang pito ka mga personalities. (JoMaque)