IPPO Director, nagpanawagan sa mga subjects sang police operation nga mag-surrender na lang kun i-operate

Sta. Barbara — Nagpanawagan si Iloilo Police Provincial Office Director Col. Marlon Tayaba sa mga subjecta sang police operations nga mag-surrender na lang imbes magbato sa mga pulis kun i-operate.

Ginhimo ni Tayaba ang pahayag matapos napatay ang sa separado nga operasyon sa probinsya ang duha ka subject nga serbihan kuntani sang warrant of arrest subong nga semana.

Suno kay Tayaba, kun indi magbato ang mga subjects, malikawan nga mabutang sa alang-alang ang kabuhi nila kag sang mga pulis.

Ginpahayag ni Tayaba nga kinahanglan man sang mga pulis nga proteheran ang ila kaugalingon sa ginahimo nga operasyon.

Sang Abril 24, napatay si Rammy Enojo sang ginserbihan sang warrant of arrest sa Barangay Tambunak, Dingle.

Kahapon, napatay naman si Yolly Armada sang ginserbihan sang warrant of arrest sa Barangay Trangka, Maasin.

Ginpahayag sang mga operatives nga nagbato ang duha rason nagdepensa sila.

‘IMBESTIGARAN SANG CHR’

Ginkunfirmar naman ni Commission on Human Rights ukon CHR 6 Director Atty. Jonnie Dabuco nga imbestigaran nila ang pagkapatay nanday Enojo kag Armada.

Suno kay Dabuco, katuyuan sang ila motu propio investigation nga mahibaluan kun nagbato gid man ang mga napatay.

Una na ginpahayag ni Dabuco nga indi na applicable ang presumption of regularity kun napatay ang subject sa police operation.

Lakip sa mga mandato sang CHR ang pag-imbestigar sa mga insidente sang paglapas sa tawhanon nga kinamatarong nga ang suspect ukon ginareklamo amo ang mga state agents kasubong sang pulis kag soldado. (JoMaque)