Lalaki, pilason matapos natiruhan sa Mandurriao

Iloilo City — Pilason ang 35 anyos nga lalaki matapos natiruhan sa New Homes Subdivision, Brgy. Dungon C, Mandurriao mga las 12:40 kahapon sang kaagahon, Abril 27.

Ginkilala ang biktima kay Armando Juanico sang nasambit nga lugar nga may pilas sa tiyan kag gindala sa Western Visayas Medical Center.

Suspek sang pagpangtiro si Carlos Britanico, 25 anyos sang Guimaras.

Suno kay Police Senior Master Sergeant Rubin Berondo sang Mandurriao Police Station, naga-inom inom sa higad sang karsada ang mag-utod nga Armando kag Christian Juanico sang naglabay ang mag-abyan nga si Britanico kag Erwin Espinosa.

Ginsita suno sa iya ni Christian Juanico si Espinosa gani nagtambag si Britanico. Sang nakita ni Armando, gintuyo niya nga lampusan sang botelya si Britanico pero wala naigo.

Base sa mga nakakita, naggabot sang pusil si Britanico kag nagpalupok sang makaduha ka beses.

Ginpahayag nga sang naigo sang botelya sa ulo si Britanico, natiruhan niya sa tiyan si Armando Juanico.

Madasig nga nagpalagyo ang suspetsado dala ang pusil. Narecover sa lugar ang tatlo ka baseyo sang ginapatihan .45 kalibre nga pusil.

Ginkastigo naman sang pamilya sang biktima ang abyan ni Britanico nga si Espinosa.

Suno kay Punong Barangay Edgar Adelante sang Dungon C, kilala nga mabu-ot kag wala sang bisyo ang biktima.

Ginapatihan naman sang kapitan nga may barkada sa ila lugar ang suspetsado gani nakakadtu sa ila barangay nga nagahiwat sang fiesta subong nga adlaw. (JoMaque)