Pulis sa Alimodian, gindis-armahan sang mga nagpakilala NPA members

Alimodian, Iloilo (UPDATED) – Gintayaan sang pusil kag gingapos sang anum ka nagpakilala NPA member ang pulis nga assign sa Highway Police Assistance Desk (HIPAD) sa Barangay Bancal, Alimodian pasado las 4 kahapon sang hapon, Abril 27.

Suno sa isa sa mga nakakita nga si Alias Julie nga natabuan sa atubang sang HIPAD sang natabo ang insidente, may nagdulog nga duha ka tricycle halin sa direksyon sang Leon kag may nagpanaog nga tatlo ka armado nga mga lalaki nga nagpakilala mga miembro sang NPA kag gintayaan si Police Corporal Jahn Jahn Anaya sang pusil. Ang tatlo pa ka lalaki ang ginpahayag ni Julie nga armado sang malaba nga pusil.

Ginbaklid sang mga armado si Anaya, gingapos sang duct tape kag ginkuha ang M16, ginapatihan 9MM, cellphone kag handheld radio.

Ginpahayag nga ginpangtayaan man ang mga malapit sa HIPAD.

Suno kay Julie, naghambal ang mga nagpakilala NPA nga pusil lang ang kinahanglan nila.

Sang nakuha na sang grupo ang mga pusil, gilayon naglakat ang grupo samtang naga-wave sa mga tawo kag nagahambal nga ‘NPA KAMI.’

Nagliko ang mga armado sa wala nga bangga nga ginabanta 50 metros ang kalayuon halin sa HIPAD.  (JoMaque)