2 tricycle drivers, gingapos sang nagpakilala NPA members antes gindis-armahan ang pulis sa alimodian; mga rebelde, nag-sorry pa kag naghatag sang tag-P500 sa drivers

Alimodian (UPDATE) — Magluwas sa pulis nga gindis-armahan sang mga nagpakilala miembro sang New People’s Army sa Highway Police Assistance Desk (HI-PAD) sa Barangay Bancal sang Abril 27, gingapos man sang mga rebelde ang duha ka mga tricycle drivers.

Dugang diri, gin-hold man sang mga rebelde sang kapin isa ka oras ang mga drivers kag ginkuha ang ila mga salakyan.

Suno sa tricycle driver nga si alyas Ben, 53-anyos, gin-arkilahan ang iya tricycle sang duha ka mga lalaki sa Leon kag nagpadul-ong sa Barangay Siol Norte para magkuha sang kahoy kag uling.

Sang nag-abot sa lugar, ginhingyo si Ben sang duha ka lalaki nga mag-upod sa ila pa-ubos, ginabanta 100 metro ang kalayuon halin sa karsada.

Nag-upod man ang driver matapos ginhatagan sang P500 apang nakibot sang nagpakilala ang iya mga pasahero nga miembro sang NPA.

Nagpangayo pa sang pasaylo ang isa sa mga pasahero kag nagpahayag nga indi dapat magpakulba ang driver sa ila.

Ginbutangan sang duct tape sang mga lalaki nga may taklos nga pusil si Ben kag ginpapungko sa idalum sang puno tubtob nga nag-abot ang isa pa gid ka driver nga si alyas Mark, 46-anyos.

‘MAKADTO SA KUMPARE’

Nagabyahe si alyas Mark sang iya tricycle sang ginparahan sang duha ka mga lalaki kag nagkontrata sa iya nga mapadul-ong sa Barangay Siol Norte, Leon.

Gindul-ong ni Mark ang duha ka lalaki sa nasambit nga barangay sa balor nga P100.

Nakibot si Mark sang nakita nga nakagapos sang duct tape si Ben kag ginabantayan sang duha ka mga lalaki.

Tuman ang kakulba kag kahadlok ni Mark sang nakita ang sitwasyon ni Ben dugang pa nga nagpakilala miembro sang NPA ang duha ka mga pasahero niya.

Kasubong kay Ben, ginpahayag man sang pasahero ni Mark nga indi siya dapat makulbaan ukon mahadlok bangud wala sila sang obrahun nga malain sa ila.

Nagtenir sang kapin 30 minutos sa lugar ang duha ka mga drivers samtang ginabantayan sang duha ka lalaki tubtob ginpalakat sila kag gintugyanan nga kuhaon ang ila mga tricycle malapit sa Aleosan Hospital.

‘SALAMAT, PERWISYO’

Nagpasalamat ang duha ka mga tricycle drivers nga ginbuy-an sila sang mga rebelde kag wala man ginsakit.

Nag-apelar naman sila sa mga rebelde nga indi sila pagperwisyuhon bangud mabutang sa alang-alang ang ila palangabuhian kasunod sang insidente.

Ang tricycle nanday Ben kag Mark ang ginsakyan sang mga rebelde pakadto sa HI-PAD antes gindis-armahan si Police Corporal John John Anaya sang Sabado, Abril 27.

Una na ginpahayag ni Police Lieutenant Danilo Noca, hepe sang Alimodian Police Station, nga ginsulod sang mga rebelde ang ila mga armas sa karton kag sako.

Dugang niya, gintabunan man sang mga campaign materials sang mga rebelde ang tricycle agud indi sila gilayon nga makita.(JoMaque)