P125 million nga figure nga ginapaguwa sang grupo ni Councilor Love Baronda nga gamiton matapos gindeklarar ang state of calamity sa syudad, ‘bloated’ suno kay Councilor Plaridel Nava

Iloilo City — Gintawag ni Councilor Plaridel Nava nga “bloated” ang 125 million pesos nga ginapaguwa sang grupo ni Councilor Love Baronda nga gamiton sang city government sa pagbakal sang tubig para sa mga apektado nga barangay sa syudad.

Gin-athag ni Nava nga reenacted budget sang 2018 ang ginagamit sang syudad.

Suno sa konsehal, P34 million lang ang available nga pondo pero P8 million ang maximum nga kantidad nga magamit base sa computation sang City Disaster Risk Reduction and Management Council (CDRRMC) kun maubos na nga ma-deliver ang tubig sa syudad.

Ipaagi man suno sa iya sa government to government ang transaction agud madula ang kahangawa nga gamiton sa politika ang pondo.

Sa ginakuwestyun naman nga quorum sang grupo ni Baronda, ginpanindugan ni Nava nga sa pagsugod pa lang sang special session sang konseho sang Abril 26, walo ka konsehal ang present gani may quorum.

May mga records man suno sa iya nga ginhatag ang CDRRMC agud suportahan ang ila deklarasyon.

Ginpahayag ni Nava nga sa 180 ka barangay sa syudad, 134 ka resolutions ang nabaton sang konseho nga nagasuporta sa pagdeklarar sang state of calamity. (JoMaque)