Desisyon sang Sandiganbayan nga naga-convict kay former Janiuay Mayor Frankie Locsin sa graft case, gin-affirm sang Korte Suprema

Iloilo City — May perpetual disqualification sa pagpangalagad sa gobierno kag pagkapreso sang anum ka tuig kag isa ka adlaw bilang minimum kag 10 ka tuig bilang maximum si former Janiuay Mayor Frankie Locsin.

Kasunod ini sang desisyon sang Sandiganbayan sa gin-file nga kaso batuk sa anay alkalde nga nagalapas sa Republic Act No. 3019 ukon Anti-Graft and Corrupt Practices Act.

Ini ang may kaangtanan sa maanomaliya nga pagbakal sang Janiuay LGU sang bulong nga nagabalor sang P15 million sang si Locsin pa ang presidente sang League of Municipalities of the Philippines-Iloilo Chapter.

Gin-deny sang Korte Suprema ang motion for reconsideration ni Locsin kag gin-affirm ang resolution sang Sandiganbayan nga napetsahan Pebrero 23 kag Hunyo 8, 2015.

Nagpaguwa ang SC sang entry of judgements sang Marso 20, 2019 nga final and executory ang desisyon sang Sandiganbayan.

Ang desisyon sang SC, ginbuyagyag sang kampo ni Janiuay Vice Mayor Jojo Lutero sa ila ginpatawag nga press conference subong nga adlaw, Mayo 1.

Ginpanghiwala naman sang bise alkalde nga may lamod politika ang pagpaguwa nila sa media sang desisyon sang Korte Suprema.

Suno sa iya, nagpangusisa lang siya sa SC sang nahambal ni Locsin sa Candidates’ Forum sang Aksyon Radyo Iloilo nga ang iya kaso sa Korte Suprema ginbalik sa Sandiganbayan. (JoMaque)