May 21, 2022

Pag-convict kay former Janiuay Mayor Frankie Locsin, wala pa sang epekto sa iya kandidatura – COMELEC 6

Read Time:1 Minute, 47 Second

Iloilo City — Wala pa sang epekto sa kandidatura ni former Janiuay Mayor Frankie Locsin ang pag-convict sa iya sang Sandiganbayan sa paglapas sa Anti-Graft and Corrupt Practices Act nga gin-affirm sang Korte Suprema sang Marso 20, 2019.

Ini suno kay Atty. Jose Nick Mendros, director sang Commission on Elections (COMELEC) 6.

Suno kay Mendros, kinahanglan anay nga may mag-file sang petition for disqualification sa COMELEC sa Manila angut sini.

Matandaan, ginpresentar sang kampo ni Janiuay vice mayor Jojo Lutero ang desisyon sang Korte Suprema sa kaso ni Locsin sang Mayo 1.

Gintinguhaan sang Aksyon Radyo Iloilo nga makuhaan sang pahayag si Locsin apang wala pa siya makahatag.

‘FOR REVIEW’

Nangin mainit ang Candidates’ Forum sang Aksyon Radyo Iloilo kag University of the Philippines in the Visayas sa mga nagakandidato mayor sa Janiuay sang Abril 12.

Magluwas kanday Locsin kag Lutero nga nagapapili bilang alkalde, nagtambong man sa forum ang iban pa nga mga kandidato nga kanday incumbent Janiuay Mayor Jojo De Paula kag SB Member Paul Parian.

Ginkwestyon nanday Lutero kag De Paula si Locsin angut sa desisyon sang Korte Suprema apang nagdepensa ang anay alkalde nga ginbalik sang SC sa Sandiganbayan ang iya kaso para ma-review.

Nanindugan man si Locsin nga wala pa sang pinal nga desisyon sa amo nga kaso nga kag may dokumento siya bilang pamatuod sini.

‘INDI AUTOMATIC’

Indi automatic nga ma-disqualify si Locsin suno kay Mendros bisan may desisyon na nga ginpaguwa ang SC.

Suno sa opisyal, nagasugod ang legal duty sang COMELEC kun dal-on ang amo nga concern sa ila komisyon paagi sa pag-file sang petition for disqualification.

Nagapati naman si Vice Mayor Lutero nga indi na kinahanglan nga may mag-file sa petition for disqualification kun basehan ang desisyon sang korte sa Aratea VS COMELEC case.

Base sa GR No. 195229 natuhoy sa amo nga kaso , bisan wala sang petition sa idalum sang Section 78 sang Omnibus Election Code, may legal nga responsibilidad ang COMELEC sa pagkanselar sang certificate of candidacy sang sin-o man nga may perpetual special disqualification nga nagpadalagan sa public office kun may pinal na ang conviction. (JoMaque)

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Previous post HVT drug personality sa Mandurriao, nadakpan sa buy bust operation
Next post City government, nagdeliver sang tubig sa mga barangay nga apektado sang water crisis