Suspek sa pagbuno patay sa fish vendor sa Oton, nadakpan

Oton —- Nadakpan na ang suspect sa pagbuno patay sa 27-anyos nga fish vendor sa Barangay Poblacion South sang Abril 30.

Ginkunfirmar ni Police Major Gervinson Moyo, hepe sang Oton Police Station, nga nadakpan las dyes sang gab-i sang, Mayo 1, si Ivan Venusa, 19-anyos sang Barangay Santa Monica, Oton.

Nakilala si Venusa paagi sa CCTV footage sa lugar kag sa witness nga nagtudlo sa iya sa paghimo sang krimen.

Ginakuhaan pa sang Aksyon Radyo Iloilo sang pahayag ang suspect apang base sa inisyal nga impormasyon suno kay Moyo, gin-ako sang suspect ang pagbuno sa biktima nga si Gerald Esteral, pumuluyo sang nasambit nga barangay.

‘Tuyo bun-on’

Sa imbestigasyon sang mga pulis, tuyo sang suspect nga bun-on ang biktima bangud ginbantayan niya kag sang iya abyan si Esteral.

Ginpahayag ginhikap ni Esteral ang pribado nga parte sang lawas sang live-in partner sang abyan sang suspect rason ginbantayan nila siya.

Nakibot naman ang abyan ni Venusa suno kay Moyo sang hinali lang ginbuno sang suspect ang biktima sa dughan.

Naka-inom ang suspect sang nagluntad ang insidente.

‘Wala sang kaangtanan sa frat’

Gin-athag naman ni Moyo nga wala sang kaangtanan sa fraternity ang krimen.

Una na gin-report nga posible may kaangtanan sa fraternity ang krimen bangud miembro sang Tau Gamma Phi Fraternity ang biktima kag nagparada ang nagkalain-lain nga grupo kag fraternities sa Oton antes nagluntad ang krimen kadungan sa opening sang Katagman Festival.

Nadiskubrehan naman suno kay Moyo nga may kaso nga attempted homicide sadto ang suspect.

Preso sa Oton Police Station ang suspect kag natalana pasakaan sang murder. (JoMaque)