Mga police nga assigned sa Moises Padilla, Negros Occidental lakip ang ila chief of police, gin-relieve

Camp Delgado, Iloilo City — Gin-confirmar ni PRO 6 Director Police Brig. General John Bulalacao nga gin-relieve ang 24 ka mga police personnel sa Moises Padilla Police Station sa Negros Occidental.

Ginbuslan ang mga gin-relieve sang 76 ka PNP personnel nga naghalin sa nagkalain-lain nga unit sang PRO 6, Regional Mobile Force Battalion kag Site Task Force Moises Padilla kag pangunahan ni Police Lt. Colonel Adrian Acollador.

May gin-deploy man suno sa iya ang Philippine Army nga 150 ka mga personnel nga magabulig sa Philippine National Police.

Ginkumpirmar man ni Bulalacao nga ginpaidalum sa Comelec control ang Moises Padilla matapos ang pag-ambush patay sa SB member kag iya tiyo sang Abril 25.

Kahapon, Mayo 6, ginhiwat man ang send off ceremony sa mga pulis kag suldado nga iga-deploy sa Moises Padilla para sa 2019 midterm elections.

Kadungan man ini sa ginhiwat nga send off ceremony sa PRO 6 headquarters sa Camp Delgado. (JoMaque)