Mga politiko nga ginpahayag nagahimo sang vote buying sa Igbaras kag Miag-ao, ginhingadlan ni PRO 6 Director John Bulalacao

Iloilo City — Ginhingadlan ni Police Regional Office 6 Director Police Brigadier General John Bulalacao ang mga pulitiko nga una niya ginpahayag nga nagahimo sang vote buying sa Igbaras kag Miag-ao base sa iya nabaton nga text messages.

Suno kay Bulalacao, nakita niya sa mga litrato ang hitsura nanday Congressman Ferj Biron, Vice Governor Christine Garin kag anay Health Secretary Janette Garin.

I-forward ni Bulalacao sa Commission on Elections ang mga litrato.

Una na nga ginbuyagyag ni Bulalacao nga nakabaton siya sang impormasyon nga nagapanghatag sang grocery kag kwarta sa Igbaras kag Miag-ao ang mga kandidato.

Sa ginpadala nga text message nanday Congressman Biron kag Vice Governor Garin, nagbalibad siya nga magkomento magluwas lang kon direkta siya nga gina-akusaran sa isyu.

Wala pa nakahatag sang pahayag si former Health Secretary Garin. (JoMaque)