4 arestado sa alleged vote buying sa Ajuy

Ajuy, Iloilo – Arestado ang duha ka Barangay Health Workers (BHWs), barangay tanod kag isa pa ka lalaki matapos gintudlo sang police nga involved sa vote buying sa Sitio Pangpang, Barangay Poblacion, Ajuy kaina sang hapon, Mayo 10.

Suno kay Police Major John Van Luspo, hepe sang Ajuy MPS, na-recover nila ang mga sobre nga may sample ballot, isa ang may unod nga P1,000, kag listahan sang mga botante.

Ginkilala ni Luspo ang mga arestado nga sanday Fe Dorban, 50 kag BHW sa Brgy. Poblacion; Nemia Arellado, 58 kag BHW sa Brgy. Poblacion, Solomon Ubay, 52 nga tanod sa Brgy. Poblacion kag Edwin Yamson, 59, residente sang Brgy. Poblacion.

Magaserbe suno kay Luspo nga testigo sa kaso nga vote buying ang ila mga operatiba nga nakasaksi kag nakabati sang ginpanghambal sang mga involved.

Ginpahayag ni Luspo nga may dugang sila nga imbestigasyon kon sin-o ang nagpamakal (buyer) kag nagpabakal (seller) sang boto.

‘PAATHAG SANG MGA NADAKPAN’

Ginpahayag ni Dorban nga ginpatawag sila sang iya kaupod nga BHW agud mag-assist sa pag-survey kag magpanghatag sang election guidelines. Pero wala sila nakahibalo nga may hatagay sang kwarta kag kon sin-o ang nagpanghatag. Nanginwala si Dorban nga involved sila sa vote buying.

Suno naman kay Ubay, nakasampot lang gid siya sang nag-abot man ang mga pulis. Suno pa sa tanod, wala siya nakakita kon may ginpanghatag nga kwarta. (JoMaque)