Barangay kagawad sa Rizal Pala-Pala II, nagreklamo nga gintampa, ginguramos sang asawa sang ila punong barangay

Iloilo City — Nagreklamo ang barangay kagawad nga gintampa kag ginguramos siya sang asawa sang ila punong barangay sa atubang ni Mayor Joe Espinosa.

Suno kay Rizal Pala-Pala II, City Proper Barangay Kagawad Jiji Balgos, sang nahibaluan niya nga pakadto si Espinosa sa ila barangay, nagkadto man siya bilang respeto sa alkalde.

Ginpahayag nga gintamyaw pa niya ang iya kumare nga si Teresita Soliman, asawa ni Punong Barangay Noel Soliman, sang naglabay siya sa ila balay. Pero nakibot siya sang gindapal siya sang makaduha ka beses kag ginguramos ni Soliman tubtob nga nakasubsob siya sa duta.

Nagapati si Balgos nga nag-umpisa ang tanan sang naghiwat siya sang gift-giving activity sa ila barangay sang nagligad nga tuig sa diin ginpahayag ni Soliman nga wala siya naglisensya.

Posible man suno kay Balgos nga nagapati si Soliman nga siya ang nag-expose sa ginapahayag pagpangilkil sang punong barangay sa mga vendors sa terminal market.

Gintinguhaan sang Aksyon Radyo nga malab-ot si Soliman pero wala ini nagasabat sa telepono kag wala man sa ila balay. (AGB/JV)