Hepe sang Sara Police Station, nagconfirmar nga nakabaton siya sang impormasyon natuhoy sa ginpahayag vote buying sa ila banwa

Sara, Iloilo (UPDATE ) — Ginkunfirmar sang hepe sang Sara Police Station nga nakabaton siya sang impormasyon natuhoy sa ginpahayag vote buying sa ila banwa.

Suno kay Police Captain Ascencion Ortizo, may nagpadala sang impormasyon sa iya paagi sa text message nga nagatudlo kag certain James Balsomo nga bagman ni gubernatorial candidate Ferj Biron.

Wala naman sang may nagreklamo ukon nag-pablotter angut sini sa police station.

Una na ginpahayag ni Iloilo Police Provincial Office Director Police Colonel Marlon Tayaba nga may nabaton man siya nga impormasyon natuhoy sa ginpahayag pagbakal sang boto sa Sara kag Carles ni certain James Balsomo.

Nagkadto naman si Atty. James Balsomo II sa Sara Police Station kahapon, Mayo 8, kag gin-athag nga wala siya kag ang tatlo niya ka mga himata nga James Balsomo man ang ngalan sang kaangtanan sa ginpahayag vote buying.

Nagapati si Atty. Balsomo nga ginamalisyahan ang iya pagsapol sa mga political leaders sang Nacionalista Party bangud siya ang isa sa mga abogado sang amo nga grupo.

‘NEGATIVE’

Ginpanginwala naman sang mga hepe sang Carles kag Igbaras Police Stations nga may ginpahayag vote buying man sa ila lugar.

Ini matapos ginanunsyar ni Tayaba nga may vote buying sa Sara kag Carles base sa impormasyon nga iya nabaton.

Una na ginpahayag ni Police Regional Office 6 Director Police Brigadier General John Bulalacao nga may nabaton man siya nga impormasyon natuhoy sa ginpahayag vote buying sa Miagao kag Igbaras.

Suno kay Police Captain Jose Romel Samson, hepe sang Igbaras Police Station, wala sang may nagreklamo sa ila angut sini kag wala man sila sang may na-monitor.

Ini man ang pahayag ni Police Captain Francis Albert Fortunado, hepe sang Carles Police Station.

Nagapadayon naman ang intelligence monitoring sang mga pulis sa nasambit nga mga banwa.

Gintinguhaan sang Aksyon Radyo Iloilo nga makuhaan sang statement ang hepe sang Miagao Police Station apang wala pa siya nakahatag. (JoMaque)