Lalaki nga kapangalan sang ginreklamo nagapamakal sang boto sa Sara kag Carles, nanginwala sa akusasyon batuk sa iya

Sara — Ginpanginwala ni Atty. James Balsomo II nga nagapamakal siya sang boto sa Sara kag Carles.

Ini matapos ginpahayag ni Iloilo Police Provincial Director Police Colonel Marlon Tayaba nga si certain James Balsomo ang nagahimo sang vote buying sa nasambit nga mga banwa base sa impormasyon nga nakalab-ot sa iya.

Suno kay Atty. Balsomo, gilayon siya nagkadto kay Police Captain Ascencion Ortizo, hepe sang Sara Police Station, matapos nabatian ang pahayag ni Tayaba agud klaruhon nga indi matuod ang akusasyon batuk sa iya, kag agud maathagan kun siya gid man ang ginapatuhuyan sini.

Magluwas kay Atty. Balsomo, James Balsomo man ang ngalan sang iya amay nga nagtaliwan na, utod nga anay konsehal sa Sara (James Balsomo I) kag sang iya hinablos.

‘GINAMALISYAHAN’

Nagapati si Atty. Balsomo nga ginamalisyahan sang iban ang iya pagsapol sa mga watchers kag supporters sang Nacionalista Party.

Gin-ako ni Atty. Balsomo nga siya ang legal counsel sang NP sa ila lugar rason masami siya nga nagasapol sa mga lideres.

Kandidato sang NP sa pagka-gobernador si 4th District Cong. Ferj Biron.

Plano ni Atty. Balsomo nga paimbestigaran kun diin naghalin ang akusasyon batuk sa iya pagkatapos sang eleksyon.

‘MAY NAGREKLAMO’

Gin-ako ni Ortizo nga may mga nagpalab-ot sang impormasyon angut sa ginpahayag vote buying sa ila lugar apang wala man sang may nag-pablotter.

Nagapadayon naman ang intel monitoring kag coordination sang mga pulis sa mga soldado agud ma-secure ang lugar. (JoMaque)