Punong Barangay sa Preciosa, Sara, gintiro

Sara, Iloilo – Gintiro ang punong barangay sang Barangay Preciosa pasado ala-una kaina sang hapon, Mayo 11.

Sa impormasyon halin kay Police Captain Ascencion Ortizo, hepe sang Sara MPS, may igo sa tiyan si Punong Barangay Ronnie Dorde nga gindala na sa ospital sa syudad.

Suno kay Ortizo, duha ka motorsiklo ang nagsulod sa Barangay Preciosa kag gin-usisa sang kapitan ang mga sakay sang naglabay sa iya balay.

Ginpahayag nga nagpanaug ang angkas sa isa ka motorsiklo kag gintiro si Dorde. Padayon ang imbestigasyon sang Sara police. (AGB)