Barangay kapitan, Chief tanod sa Agnaga, Concepcion, arestado matapos nakuhaan sang mga pusil, bala kag suspected shabu

Sara, Iloilo — Arestado si Punong Barangay Edgardo Oro sang Barangay Agnaga kag iya chief barangay tanod nga si Arnel Ambros, 49 anyos, matapos nakuhaan sang pusil, bala kag sachets sang suspected shabu sang ginserbihan sang search warrant las 6 kahapon sang aga, Mayo 11.

Lakip man sa gin-serbihan sang search warrant si Benny de Guzman, 54 anyos, barangay administrator kag retirado nga miembro sang Armed Forces of the Philippines.

Ginhimo ang operation sang gintingub nga puwersa sang Concepcion police kag 2nd Iloilo Provincial Mobile Force Company.

Na-recover kay Kapitan Oro ang .45 kalibre nga pusil; 45 caliber pistol magazine kag pito ka mga bala.

Nakuha kay Ambros ang 12-gauge shotgun; isa ka bala sang M79/M203; tatlo ka bala sang .45 kalibre nga pusil kag anum ka sachets sang suspected shabu.

Nakuhaan naman sang rifle grenade si De Guzman.

Suno kay Major Jonah Galicha, hepe sang Concepcion Police Station, madamo sila sang nabaton nga reklamo halin sa mga pumuluyo angut sa ginapanag-iyahan nga mga pusil sang tatlo kag ini ang ila gin-validate.

Wala sang may napakita nga lisensya sang pusil ang mga nagkaladakpan sang gin-usisa sang kapulisan.

Dugang pa ni Major Galicha, posible nga magpangatubang sang kaso nga illegal possession of firearms and ammunition si Kapitan Oro; illegal possession of explosives naman ang kay De Guzman; samtang illegal possession of firearms and ammunition and possession of illegal drugs ang kay Ambros. (JoMaque)