Punong barangay sa Preciosa, Sara nga gintiro, gin-operahan na; Mga suspek, wala gihapon madakpan

Sara, Iloilo (UPDATE) – Gin-operahan na si Preciosa, Sara Punong Barangay Ronnie Dorde matapos gintiro kaina sang hapon, Mayo 11.

Pero nagbalibad pa ang pamilya ni Dorde sa paghatag sang dugang nga mga detalye sa natabu. Confine si Dorde sa ospital sa syudad.

IMBESTIGASYON SANG POLICE

Sa imbestigasyon ni Police Captain Ascencion Ortizo, hepe sang Sara MPS, kaupod ni Edgardo Sumera ang tatlo ka lalaki nga nag-abot sa barangay. (Si Sumera ang tumandok sang Barangay Preciosa kag nagpadalagan sa barangay elections kontra kay Dorde.)

Suno kay Ortizo, ginpatawag ni Dorde si Sumera kag ang iya mga kaupod bangud indi kilala sang kapitan. May pagsabtanay suno kay Ortizo nga natabu tubtob nagabot sang pusil ang angkas sang isa sa mga motorsiklo kag gintiro si Dorde nga naigo sa tiyan.

Nagpalagyo ang apat.

Makabig nga election-related ang natabu suno kay Ortizo bangud supporter si Sumera ni retired General Jon Aying nga nagapadalagan mayor samtang ang grupo ni Dorde ang ginpahayag nagasuporta kay JR Salcedo.

REAKSYON NI GEN. AYING

Gin-ako ni retired Gen. Aying nga supporter niya si Sumera pero gin-athag nga wala siya sang kahilabtanan sa natabu.

Indi niya man kilala ang mga kaupod ni Sumera.

Ginpanindugan ni Aying nga ginaduso sang iya grupo ang malinong kag matawhay nga eleksyon.

‘WE ARE JUST IMPLEMENTING THE LAW’

Ginahulat pa ni Iloilo Police Provincial Office Director Police Colonel Marlon Tayaba ang resulta sang imbestigasyon sang Sara police sa natabu.

Nag-react naman si Tayaba sa pila ka social media posts nga ‘ginagamit’ ang mga pulis pabor kay Aying kag sa mga provincial candidates nga ginasuportahan sang retired General.

Pagtadlong ni Tayaba, ginasunod lang nila ang mandu ni Presidente Rodrigo Duterte nga hugtan ang pagbantay agud wala sang makalusot nga vote buying kag masiguro nga matinlo ang midterm elections. (JoMaque)