Cong. Toto Defensor, abanse sa gubernatorial race

Iloilo – Nagapabilin nga abanse si 3rd District Congressman Toto Defensor batuk kay 4th District Congressman Ferj Biron sa gubernatorial race.

Tubtob alas-4:50 kaina sang hapon, Mayo 14, 98.67% na sang election returns ang na-transmit sa Comelec sa diin nakakuha si Defensor sang 473,703 votes samtang si Biron ang may 383,990 votes.

Sa pagka-vice governor, nagapanguna si incumbent Vice Governor Tingting Garin nga may 435,403 votes samtang si Mayor Beng Tupas ang may 392,764 votes.

Sa pagka-board member, sa first district, wala sang kasumpong sanday Board Members Val Serag kag Coy Valencia. Sa segundo distrito, ang top 2 nga may pinakamadamo nga boto amo sanday Rolito Cajilig kag June Mondejar. Sa third district, nagapangibabaw sanday Matt Palabrica kag Mayor Jason Gonzales. Sa fourth district, may pinakamadamo nga boto sanday Board Member Domingo Oso Jr kag Rolly Distura. Samtang sa fifth district, may pinakamadamo nga boto sanday Atty. Carol Espinosa kag Doc Darl Tupas.

Sa pagka-kongresista, nagapangibabaw si former Health Secretary Janette Garin kontra kay Gerardo Flores sa first district. Sa second district, nagpangibabaw si Pavia Mayor Mike Gorriceta kontra kay Sta. Barbara Mayor Dennis Superficial. Sa third district, mas madamo ang boto ni Board Member Lorenz Defensor kon ikumparar kay Board Member Manny Gallar. Sa fourth district, nagapangibabaw si Toto BJ Biron kontra kay Marven Daquilanea. Samtang sa fifth district, nagpangibabaw si incumbent Congressman Boboy Tupas kontra sa iya magulang nga si former Congressman Junjun Tupas. (AGB)