1 patay, 3 pilason sa rumble sa Infante, Molo

Iloilo City — Isa patay kag tatlo ang pilason sa nagluntad nga rumble sang mga kalalakihan sa atubang sang barangay hall sa Infante, Molo ala una y medya kaina sang kaagahon, Mayo 15.

Gindeklarar nga napatay las 5:30 kaina sang kaagahon John Ferick Segotier, 24 anyos sang Calumpang, Molo nga may tatlo ka pilas sang pagkabuno sa dughan, wala nga parte sang guya kag tu-o nga parte sang likod.

Pilason naman sanday John Loyd Alger, 18 anyos sang Barangay Infante; Zaro Drilon, 25 sang Rizal Pala-Pala Uno, City Proper kag Gazer Franco, 27 sang Boulevard, Molo.

Suno Kay Police Chief Master Sergeant Romelo Tabuyoc, imbestigador sang Molo Police Station, nagsugod ang gamu bangud sa indi pag-intiendihanay.

Nagreklamo suno sa iya ang suspek nga si Gazer Franco bangud sa madugay nga paghulat sa pila sa mga nagabayad sa entrance sang Fishing Port.

Nagasakay ang suspek sa motorsiklo upod ang iya abyan nga si Ramon Parcon Jr kag nagasunod sa pila sang mag-abyan nga Segotier kag Christian Gloria, 25 sang Veterans’ Village, City Proper.

Ginpahayag nga naguwa sa Fishing Port si Gloria kag ginsunod sang duha ka suspek tubtub nagluntad ang inaway kag pagpangbuno.

Nadalahig sa gamu si Segotier sang nag-apas siya sa iya abyan.

Nagtambag naman sa inaway sanday Alger kag Drilon pero pati sila ang nabun-an.

Ginpangdala sa ospital ang mga pilason lakip na ang suspek nga si Franco.

Arestado man ang upod ni Franco nga nagpugos kay Segotier. Narecover sa lugar ang ginabanta 8-inches nga balisong. (JoMaque)