Cong. Ferj Biron, nagpabutyag nga nabiktima sang ‘last minute manipulation’ sang iya kasumpong rason sang iya kalutusan sa gubernatorial race

Iloilo City – Biktima sang ‘last minute manipulation’ ang rason ni Congressman Ferj Biron sa iya kalutusan sa gubernatorial race sa probinsiya sang Iloilo sa bag-o lang natapos nga midterm elections.

Suno kay Biron, madamo ang mga pumuluyo nga nagapati sa iya mga programa para sa probinsiya, pero wala niya na-preparahan ang iya gintawag nga ‘last minute manipulation’ sang iya kasumpong.

Gin-akusaran man ni Biron ang mga pulis nga ‘private army’ ni Governor Arthur Defensor nga gingamit sa election. Suno sa iya, ginpasundan ang mga lideres sang iya partido kag ‘ginpigos’ ang iya mga kaalyado nga pulitiko antes ang election.

Nagpamalibad naman si Biron nga mag-detalye angut sa iya kagastuhanan sa election.

Sa pihak sini, nagpabutyag si Biron nga ma-‘move on’ na siya bangud nangin kabahin lang ang eleksyon sang iya experyensiya.

Magabalik siya bilang pribado nga individual kag tutukan ang iya mga negosyo.

As of May 15, 3:44pm base sa 99.63% nga election returns sang Comelec, malapit 90,000 ang abanse ni Congressman Arthur Defensor Jr., batuk kay Biron. (JoMaque)