PDEA 6, may impormasyon nga nagagamit sang illegal nga druga ang mga PUV drivers

Iloilo City — Ginkunfirmar ni Philippine Drug Enforcement Agency ukon PDEA 6 Officer-In-Charge Alex Tablate nga may nabaton sila nga impormasyon nga nagagamit sang illegal nga druga ang mga Public Utility Vehicle ukon PUV drivers.

Suno kay Tablate, tinuig na ang nakaligad sang nabaton nila ang amo nga impormasyon kag padayon ang ila validation.

Ginamonitor man sang drug agency ang posible pagdala sang illegal nga druga sang natungdan nga mga drivers.

Kahapon, Mayo 16, 144 ka mga driver sang tricycle, taxi, truck kag pila ka mga dispatcher sa syudad ang gin-subject sa random drug test sang PDEA, LTFRB,LTO, DOH kag city government apang negatibo sa resulta.

Una na ginreport nga indi pagpasakaan sang kaso ang mga drivers nga magpositbo sa drug test apang kuhaon ang ila driver’s license kag i-subject man sa drug rehabilitation program suno kay Tablate.

‘MAY ARA…’

Gin-ako naman ni Iloilo City Loop Alliance of Jeepney Owners and Drivers Association ukon ICLAJODA Presidente Raymundo ‘Boyet’ Parcon nga may pila ka mga driver sa ila asosasyon nga nagagamit sang illegal nga druga apang nag-untat na.

Kapin 10 ka mga drivers sa ICLAJODA ang nagpaidalum sa drug rehabilitation sa Police Regional Office ukon PRO 6 suno kay Parcon.

Dugang niya, may nadakpan man nga driver matapos nakuhaan sang illegal nga druga sa sulod mismo sang iya ginabyahe nga jeep.

Matandaan, ginpaidalum sa drug test sa PRO 6 ang mga jeepney kag taxi driver sang 2016 kag ginahatagan sang drug free nga ID apang wala na nadayon.

Ginakuhaan pa sang Aksyon Radyo Iloilo sang pahayag ang Association of Taxi Operators in Panay ukon ang ATOP angut sini. (JoMaque)