3 na-ospital sa duha ka aksidente sa motorsiklo sa Dumangas

Iloilo – Na-ospital ang duha ka babaye kag isa ka lalaki nga involved sa duha ka aksidente sang motorsiklo sa Barangay Balabag, Dumangas subong nga gab-i, Mayo 18.

Suno kay Police Master Sergeant Ronald Domines, imbestigador sang Dumangas MPS, una nga nasagairan ni Rolen Seguia sang Cabilauan, Barotac Nuevo si Jessica Ario, 55 nga nagatabok sa karsada rason nga natumba ang duha.

Samtang nagahulat sang rescuers sa bulig sang mga tanod sang Barangay Balabag, naglabay ang naka-motorsiklo nga si Ronito Lego sang Cabilauan, Barotac Nuevo. Wala niya natalupangdan ang 15 anyos nga dalagita nga nagakuha sang litrato sa una nga aksidente gani iya man nga nasagairan.

Gindala sa ospital sa Barotac Nuevo kag Dumangas ang duha ka babaye kag si Seguia. Conscious ang tatlo suno kay Police Master Sergeant Domines.

Gindakup naman sang Dumangas police si Lego bangud wala siya sang lisensya nga ginpakita. (JoMaque)