Barangay tanod sa Jaro, patay sang ginbuno samtang naga-duty

Iloilo City — Patay ang barangay tanod sang Barangay Our Lady of Fatima, Jaro matapos ginbuno sang suspetsado kaina sang kagaahon, Mayo 18, samtang naga-duty.

Ginkilala ang biktima kay Jenny Francisco, 48 anyos kag residente sang amu man nga lugar. May tatlo ka pilas ang biktima, duha sa dughan kag isa sa likod.

Suno kay Genevive Francisco, utod sang biktima, nagapungko ang tanod sa kilid sang dalan pasado ala-una kaina sang kaagahon kag ginbuno sang wala pa makilala nga suspetsado.

Nadula ang wallet kag tablet nga Lenovo sang biktima. Gina-imbestigaran pa sang police kon hold-up ang natabu sa biktima. (AGB)