‘Gold bar’ sellers, dakup sa entrapment operation sang CIDG sa Mina, Iloilo

Iloilo City – Arestado ang duha ka nagabaligya sang ginapatihan nga gold bar sa entrapment operation sang Criminal Investigation and Detection Group Iloilo sa Barangay Bangac, Mina kahapon, Mayo 17.

Ginkilala ang mga nadakpan kanday Joel Unabia sang Banate kag Ma. Yochabel Vidal, 60, sang Roxas City, Capiz.

Na-recover sa ila ang 4x4x16 inches nga “gold bar” nga nagabug-at sang 74 kilo. Nakuhaan pa si Unabia sang 45 caliber nga pusil.

Suno kay Lieutenant Colonel Anthony Gantang sang CIDG Iloilo, Abril subong nga tuig sang may mga negosyante nga nagpangayo sa ila sang bulig bangud nagaduda sila sa naga-transaksyon sa ila nga nagabaligya sang ginpahayag nga gold bar.

May nagpakuno-kuno nga pulis nga kaupod ang mga negosyante pero nagasaylo-saylo sang lugar ang mga suspek.Nagapangayo man sila sang kwarta sa mga negosyante.

Kaina, una naghambal ang mga suspek nga himuon ang transakyon sa Barotac Nuevo pero nagsaylo sa Pototan tubtob nakalab-ut sa Mina.

Ginpaguwa lang sang mga suspek ang ginpahayag nga gold bar sang nakita ang dala nga boodle money sang mga negosyante nga P10 million rason nga gindakup ang duha.

Gin-ako sang mga suspek suno kay Gantang nga may parte sang bar nga may bulawan kag diri sila nagakuha sang sample kon magpangayo ang ila ka-transaksyon.

Ipa-check sang CIDG kon matuod nga gold bar ang nakumpiskar kag kon mapamatud-an nga peke, pasakaan sang kaso nga syndicated estafa sanday Unabia kag Vidal. (JoMaque)