Taxi kag awto, nagbunggu-anay sa Sambag, Jaro

Iloilo City — Apat ang gindala sa ospital matapos nagbunggu-anay ang awto kag taxi sa Sambag, Jaro subong nga gab-i, Mayo 18.

Base sa imbestigasyon sang Jaro police, nabungguan sang awto nga ginamaneho ni Christian Francis Armada, 34 anyos sang Kahirupan, City Proper ang taxi nga ginamaneho ni Rodolfo Landero sang Alibhon, Guimaras sakay ang duha ka pasahero.

Naglapaw sa pihak nga lane ang awto kag nakabunggo sa taxi. Nalipong kag pilason si Armada sang gindala sa ospital.

Samtang minor naman ang pilas ni Landero kag iya duha ka pasahero.

Suno naman kay Eduardo Hugo, barangay tanod sang Sambag, madasig ang dalagan sang awto antes naaksidente.

Posible nga nadulaan siya sang kontrol sa manibela rason nga naaksidente.

Lusay wasak ang atubang nga parte sang duha ka salakyan. (JoMaque)